Një ndër vodkat më të shtrenjta në botë është vjedhur të mërkurën në një lokal danez.
Pronari i lokalit, Brian Ingberg, aspak i qetë pas grabitjes, kërkon që vodka me vlerë 1.3 milion dollarë, pjesë e koleksionit të tij, të gjendet dhe të rikthehet sërish në barin e tij.
“Atë shishe e kam siguruar nga fabrika Dartz, e cila krijon veturat dhe vodkat më të mira të globit. Ka qenë pjesë e koleksionit tim. Sigurisht që jam shumë i shqetësuar. Ajo vodka ishte qershia mbi tortën e 1200 shisheve që koleksionoj. Më e veçanta nga të gjitha”, thotë Brian Ingberg.
Policia e Kopenhagenit konfirmoi se në lokalin ‘Café 33’ është vjedhur një shishe vodkë aspak e zakonshme.
Për krijimin e shishes janë përdorur 3 kg ar dhe tre të tjera argjend, dhe vetëm shishja kushton mbi një milionë euro. Gjithashtu, ajo është zbukuruar edhe me pjesë lëkure nga një makinë, që pat garuar në Monte Carlo, në vitin 1912.
Ajo fitoi vëmendje të madhe pasi u shfaq në serialin e famshëm televiziv amerikan “House of Cards”.
Grabitësi ka mundur të hyjë në ndërtesë, pasi pjesa e saj ku ekspozoheshin shishet e rralla të vodkës, ishte mbyllur për publikun.
