Dueli i shumëpritur i UFC on Fox 29 mes Dustin Poirier dhe Justin Gaethje në peshën e lehtë zhvilluar në Arizona të Amerikës, dhuroi spektakël për tifozët e arteve marciale mikse. Dueli u fitua nga Poirier në sekondat e fundit të raundit të katërt me “KO Teknik”.
Për Poirier, 23 fitore, 5 humbje dhe 1 duel pa rezultat, kjo ishte një fitore që e afron me një përballje për titullin kampion në peshën e lehtë. “Justin është një luftëtar. Nëse gjyqtari nuk do ta kishte ndalur duelin, ai mund të kishte vdekur nga shkelmat e mi”, u shpreh fituesi i përballjes kryesore të këtij eventi.
Që në raundin e parë sportistët treguan se do të dhuronin një përballje të bukur, por edhe të egër njëkohësisht në kafaz, pasi edhe Gaethje e goditi disa herë rivali me shkelma e grushte. Por në raundin e dytë Poirier u tregua më konkret dhe reagon, duke e bërë edhe më të bukur sfidën e më pas ai komandon duelin në kafaz edhe në raundin e tretë. Gaethje nis gradualisht të humbasë shkëlqimin e fillimit të duelit dhe në raundin e katërt çorientohet, duke u mundur me “KO”.
Për Gaethje, kjo është humbja e dytë në kafaz, madje e dyta radhazi, që vijnë pas 18 fitoresh radhazi e tashmë i largohet mundësisë për një event kryesor të UFC-së.
