Kryeministri Edi Rama i ka dërguar sot një mesazh presidentit Ilir Meta, duke iu përgjigjur deklaratës së këtij të fundit se “nuk ka fuqi jashtëtokësore që të më trembë mua as me drejtësi dhe as me padrejtësi”.
Këtë deklaratë, presidenti Meta e bëri para pak ditësh, teksa ishte i ftuar në emisionin “5 pyetje nga Babaramo”.
Ndërkohë, kryeministri Rama zgjodhi t’i përgjigjet sot Metës, gjatë fjalës së tij në përkujtimin e 4 të vrarëve gjatë protestës së 21 janarit të PS-së, para 7 vitesh.
Teksa foli për një drejtësi to vonuar, por që do të vihet në vend falë Reformës në Drejtësi, Rama u shpreh, duke iu referuar Metës:
“Sot thonë se as vet Zeusi nuk i ndalon dot këta shpëtimtarë të popullit të Shqipërisë, që t’i prijnë një kthimi në kohë të arta të bumit ekonomik, ku të gjitha plagët e tmerrshme që kemi hapur ne ishin thjesht probleme të rritjes të Shqipërisë si vend i zhvilluar, siç thoshte edhe kënga e Çiljetës në fushatën e daulleve të zhvillimit.”
