Policia spanjolle ka goditur një bandë kriminale shqiptare në Madrid, të cilët besohet se kanë qenë përgjegjës për gati dyqind plaçkitje.
Pesë vetë, dy gra dhe tre burra të moshës midis 21 deri në 47 vjeç, u arrestuan pas një vale të vjedhjeve të makinave, dhe sendeve personale. Në Spanjë ata konsideroheshin si banda më e rrezikshme, pasi grabisnin vetëm vila, shkruan europapress.es.
Mes personave që kanë rënë pre e tyre ishte edhe kapiteni i Atletiko Madridit, Gabi Fernandez, në banesën e të cilit u grabit një orë, veshje dhe një xhaketë me vlerë 10.000 euro.
Banda e shqiptarëve, për një muaj e gjysmë kishte arritur të kryente 200 grabitje, dhe shuma e vjedhur kalonte shifrën 1 milion euro. Ata grabisnin 5 deri në 6 vila në ditë dhe kryesisht merrnin bizhuteri dhe veshje.
Guardia Civil nuk ka përjashtuar arrestime të mëtejshme në lidhje me rastin, pasi hetimi është në vazhdim.
