“Shqiponja” është kthyer në një çështje kohët e fundit. Gjithçka filloi pas shqiponjës në botërorin e Rusisë, kur Granit Xhaka dhe Xherdan Shaqiri festuan golat ndaj Serbisë. Kjo solli reagime të shumta dhe serbët e quajtën një provokim politik. FIFA dënoi futbollistët në fjalë dhe Zvicra më pas, u kërkoi lojtarëve ta ndalonin festimin me shqiponjë.
I njëjti problem duket se ka lindur edhe në Suedi. Federata atje ka vendosur që të ndalojë bërjen e shqiponjës nga futbollistët. Vendimi lindi pasi futbollistja Kosovare Asllani festoi shënimin e golave duke bërë me duar shqiponjën, e kjo sipas tyre është një provokim dhe gjest me prapavijë politike.
Vetë lojtarja nga Kosova që luan me Suedinë e konsideroi të papranueshëm këtë vendim. Ajo nuk përjashtoi mundësinë e bërjes sërish të shqiponjën, sepse kështu ajo me krenari tregon prejardhjen e saj
“Për mua, kjo është e papranueshme. Disa mendojnë se është një provokim dhe gjest politik, por nuk është dhe jam krenare që e kam bërë. I përket prejardhjes sime, së kaluarës sime dhe ka ardhur spontanisht në gëzim e sipër.
Është një nder dhe krenari që e ndiejnë krejt shqiptarët. Unë e kam marrë një përgjigje pozitive nga shqiptarët e Kosovës në tërë botën. Kam dëgjuar që ishte një televizion në Kosovë, i cili e ka përsëritur klipin e festimit me shqiponjë për 24 orë. Për këtë jam e nderuar dhe krenare”, sqaroi Asllani.
