I mbuluar nga suksesi i Paul, Florentin Pogba nuk po arrin të shpërthejë në fushën e lojës dhe në ndeshjen e fundit e kanë tradhtuar edhe nervat. Kemi parë shpesh përplasje mes futbollistëve të dy ekipeve në fushë, por në sfidën mes Genclerbirglit dhe Antaliasporti në Superligën turke konflikti ka qenë brenda grupit. Protagonist në incidentin e ndodhur ishte vëllai i Paul Pogba. Ai aktivizohet me skuadrën e Genclerbirglit, e cila u mposht në shtëpi me rezultatin 0-1.
Ishin minutat e fundit të lojës dhe 27-vjeçari pas një shqetësimi që ndjeu në këmbë vendos që të lerë fushën e lojës pa pyetur askënd, duke lënë me 10 lojtarë ekipin e tij. Por dalja e tij nga fusha nuk është pritur aspak mirë nga shokët e skuadrës, pasi zëvendësimet ishin kryer të tre zëvendësimet dhe për pasojë mbetën me një lojtarë më pak.
Kjo bëri që disa prej tyre të vërsuleshin drejt Pogbas dhe të konfliktoheshin me të, duke përdorur edhe duart. U desh ndërhyrja e drejtuesve që situatë të mos degjeneronte në grushte, ndërsa videoja e incidentit të ndodhur është duke bërë xhiron e internetit. Mbrojtësi Florentin Pogba, numëron 8 paraqitje me fanellën e skuadrës turke ndërsa në të kaluarën është aktivizuar me Sedanin dhe St. Etienin.
