Kreu i Policisë së Shtetit pritet të japë dëshminë e tij te Prokuroria e Krimeve të Rënda për çështjen “Babale”. Por, përpara se ai të dëshmojë deputeti demokrat i ka kërkuar Prokurorisë arrestimin e Ardi Veliut.
Deputeti Ervin Salianji ka publikuar disa përgjime të reja. Ato janë zhvilluar mes Fredi Alizotit dhe disa personave të tjerë, ku flitet sërish për një pagesë.
Salianji deklaroi se këto përgjime, tregojnë se Alizoti është aktori i sajaur nga Rama. Sipas tij ai është paguar nga Taulanti nga Librazhdi dhe Ardi Veliu nga Delvina. Deputeti i PD, bëri publik disa nga telefonatat e përgjuara ku citoi ndër të tjera: “Hap gojën sa do”, i tha shoku nga Librazhdi.
Salianji tha se përgjimet faktojnë përfshijnë e Taulant Ballës dhe Ardi Veliut në fabrikimin e dëshmitarit të rremë.
Deklarata e Ervin Salianjit
Sot po publikojmë një pjesë tjetër të dosjes së përgjimeve të Prokurorisë në datën 27 Maj vetëm tre ditë para se aktori i Ramës të rekrutohej edhe zyrtarisht nga Policia e Shteti ai bën këtë bisedë:
Provat që sajuan një dëshmitar të rremë janë të pakundërshtueshme. Faktet e pakundërshtueshme i ka parë me zë e figurë çdo shqiptar, përfshirë edhe Prokuroria, që i ka në fashikullin e plotë. Ato faktojnë përfshijnë e Taulant Ballës dhe Ardi Veliut në fabrikimin e dëshmitarit të rremë Alizoti. Sot po publikojmë dokumentet që tre ditë para se të dilte aktori i Ramës, ai bën këtë bisedë, citoj:
“Më është afruar një gjë e mirë nga ana tjetër”.
Më poshtë Alizoti bën pohimin shkatërrues. Në përgjimin tjetër ai thotë se më mirë bëj një vit burg e të marr ato që më janë afruar sesa të rri kështu. Pra , qartësisht ai i referohet dëshmisë së rreme që dënohet me 1 vit burg.
Përgjimi provon pikërisht pse është dëshmi e rreme. Kështu Albert Veliu në përgjimin tjetër, pas datës 1 qershor, pas rekrutimit zyrtarisht të aktorit të Edi Ramës, i thotë, citoj:
“Çfarë lidhjeje ke ti e këtë punë? Çfarë pune ke ti që u afrohesh, kur nuk ke asnjë lidhje me këto gjëra?!”
Këto janë prova të mjaftueshme që sot Prokuroria e Përgjithshme e Krimeve të Rënda të arrestojë Ardi Veliun për shpërdorim detyre, fabrikim provash në mbrojtje të një trafikanti droge.
Këto prova janë mjaft për ta arrestuar Ardi Veliun.
Provat tregojnë qartë se Prokuroria ka mbyllur sytë për të realizuar skenarin mafioz të Edi Ramës që mbron trafikantin e drogës dhe sulmon gazetarin dhe denoncuesit. Sot është dita kur Prokuroria duhet t’i japë fund farsës që ka ngritur deri më sot.
Sot është dita kur Ardi Veliu duhet të jetë në burg. Sot është dita kur Drejtori i Policisë së Fierit duhet të jetë në burg. Sot është dita kur Taulant Balla duhet të ishte në procedim penal me imunitet të heq nga parlamenti për sajim të provave dhe blerje të dëshmitarit të rremë.
Sot Fatmir Xhafaj duhej të ishte nën hetim për mbështetjen shtetërore që i ka dhënë vëllait të vet trafika droge dhe duhet të ishte nën hetim për shpërdorim detyre dhe pengim të drejtësisë.
Fundin e Edi Ramës nuk e fshehin dot veglat e tij.”/TIRANA TODAY/
