Policia ka parandaluar një tjetër rast të trafikimit të lëndëve narkotike, duke bërë të mundur prangosjen e një shtetasi italian. Në flagrancë është arrestuar një 60-vjeçar, ndërsa janë sekuestruar në cilësinë e provës materiale 6 kg e 105 gramë lëndë narkotike, e dyshuar marijuanë.
“Gjatë procedurave të kontrollit kufitar në Pikën e Kalimit Kufitar Durrës, mbrëmjen e djeshme, Policia Kufitare ka ushtruar kontroll në një mjet me drejtues një shtetas italian, me destinacion Italinë.
Gjatë kontrollit të imtësishëm të ushtruar në vijën e dytë mjetit tip Fiat, në pjesën e poshtme të mbrapakolpit u gjetën dhe sekuestruan në cilësinë e provës materiale rreth 6 kilogramë e 105 gramë lëndë narkotike e dyshuar, e llojit marijuanë.
Veprimet e mëtejshme procedurale u kryen nga ana e Specialistëve për Hetimin e Narkotikëve në Drejtorinë Vendore të Policisë Durrës, të cilët arrestuan në flagrancë shtetasin Piero Mormina, 60-vjeç, banues në Itali”, bëhet me dije në deklaratën zyrtare të policisë.
Materialet i kaluan Prokurorisë së Rrethit Gjyqësor Durrës, për veprime të mëtejshme, për veprën penale “Trafikimi i lëndëve narkotike”.
