Masoneria, është një term që tremb shumë njerëz. Ajo lidhet zakonisht me veprimtarinë okulte të një grupimi njerëzish, që synojnë të diktojnë rrjedhën e historisë së një vendi apo mbarë botës. Vetë masonët, pretendojnë se nuk janë një lëvizje që i do të keqen njerëzimit.
Përkundrazi, thonë se bartin dhe përçojnë trashëgiminë më të vyer të paraardhësve tanë më të ndriçuar mendërisht, e cila u jep përgjigje sfidave më të mprehta të kohës. Në Shqipëri, ekzistojnë aktualisht disa lëvizje masonike.
Më kryerosja është Llozha e Madhe Shqiptare, e themeluar në tetor të vitit 2011. Në uebsajtin zyrtar, kjo llozhë pretendon se do të punojë “për të ruajtur dhe kultivuar traditat dhe vlerat e popullit tonë, solidaritetin e madh njerëzor dhe ndihmën e pakursyer për nevojtarët”. Ndërkohë në praktikë, nuk dihet se cilat kanë qenë kontributet e saj në dobi të vendit.
Ndërkohë sipas të dhënave nëpër disa uebsajte, në Shqipëri ekzistojnë edhe Llozha masonike Iliria, dhe ajo Epidamnus. Masoneria në Shqipëri, thuhet se i ka rrënjë shumë të vjetra, nga perandorët ilirë të Bizantit, deri tek veprimtarët e Rilindjes dhe pavarësisë, si vëllezërit Frashëri apo Ismail Qemali. Maksim Zotaj, frimasoni shqiptar i “Lozhës Blu” të Nju Jorkut, ka pretenduar në një intervistë televizive pak vite me parë, se politikanë të ndryshëm shqiptarë, i kishin ofruar miliona euro, vetëm për të qenë anëtarë të ndonjë llozhe.
