Mao Ce Duni nderohet ende sot në Kinë si “Timonieri” i madh, pavarësisht dhjetëra miliona kinezëve të vdekur, si pasojë e terrorit dhe politikave të tij të gabuara. Mund të duket e habitshme, por diktatori ka qenë shumë i turpshëm në fëmijëri. Madje thonë se ishte aq i ndrojtur, saqë natën e parë nuk i ishte afrua fare nuses.
Këtë kompleks, u mundua ta kompensonte në pleqëri, ku kërkoi t’i sillnin çdo natë në dhomë nga një vajzë të re dhe të virgjër. Me zhvirgjërimin e vajzave të mitura, ai mendonte se luftonte plakjen, i nxitur edhe nga një legjendë e vjetër kineze. Si çdo diktator, ai ka pasur dhe jetën zyrtare. Mao pati 3 gra.
Të parës armiqtë i prenë kokën, pasi nuk pranoi të mohonte burrin e saj. E dyta nuk e përballoi dot kohën e terrorit komunist ndaj intelektualëve, dhe u çmend. Ndërsa e treta u burgos pas vdekjes së tij, deri në fund të jetës. Përveç tezave të tij famëkeqe për zhvillimin e vendit, që shkaktuan vdekje dhe uri masive, lideri komunist kinez kishte një sens të madh humori.
Gjatë takimit në Pekin me shefin e diplomacisë amerikane, Henri Kisinger, në vitin 1973, ai i propozoi dërgimin në SHBA të 10 milionë grave kineze, si një mënyrë për të adresuar problemin e mbipopullimit. I zënë në befasi nga kjo ofertë e pazakontë, Kisingeri tha se ajo do të shqyrtohet. Sigurisht që Uashingtoni nuk e mori seriozisht këtë çështje. Por ky propozim, u trajtua me ironi nga media, si një përpjekje dinake e Kinës “për të pushtuar SHBA-në”. TIRANA TODAY
