Shumë njerëz bëjnë gjithçka për para. Disa shkojnë edhe në luftë. Mercenarët kryejnë zakonisht punën e pista të ushtrive zyrtare, dhe paguhen shumë për këtë. Në ushtrinë amerikane, një ushtar fillestar mund të fitojë rreth 20.000 dollarë në vit, përjashtuar taksat. Ndërkohë një mercenar profesionist dhe me disa vite përvojë, mund të fitojë mesatarisht 150.000-250.000 dollarë në vit. Ky lloj aktiviteti është gjysmë i paligjshëm. Kombet e Bashkuara e kanë ndaluar rekrutimin, trajnimin, përdorimin dhe financimin e mercenarëve me një konventë të vitit 2001.
Ajo është ratifikuar nga 35 shtete, por jo nga Rusia, Britania apo Shtetet e Bashkuara, që kanë edhe ushtritë më të mëdha private. Diktatorët, kur e kanë lakun në fyt, janë të gatshëm të paguajnë shuma marramendëse për të ruajtur pushtetin apo shpëtuar kokën. Në vitin 2011, lideri libian Muamar Gadafi, paguante deri në 2 mijë dollarë në ditë qindra mercenarë. Por kjo nuk i shpëtoi dot jetën.
Mercenari është besnik ndaj parave që i takojnë, dhe ndaj askujt tjetër. Pikërisht për këtë arsye, ata angazhohen shpesh në masakra të ndryshme, ndërsa vihen rrallë përpara përgjegjësisë ligjore.
