Shqiponja e Granit Xhakës dhe Xherdan Shaqirit që u “ngrit” pas golave që i shënuan Serbisë vazhdon të komentohet gjatë në mediat fqinje. Për atë gjest të dy futbollistët dhe kapiteni i Zvicrës, Lishtajner janë dënuar nga FIFA. Por edhe këtë e kanë zgjidhur tifozët shqiptarë, pasi me anë të një donacioni kanë mbledhur shumën e parave që ishin dënuar të tre futbollistët, pasi ai gjest i kishte bërë shumë krenarë.
Ndërsa tani mediat greke dhe serbe kanë publikuar një video ku shfaqet Granit Xhaka në një lokal dhe këndon këngën “Shqipërinë e dua se jam shqiptar, Kosovën e dua se jam kosovar”. Kjo video po bën xhiron e rrjetit edhe pse nuk dihet saktësisht se kur është xhiruar, por mediat në fjalë janë duke e përdorur për ta “ftohur” atë me zviceranët duke u treguar se ai asnjëherë nuk do të jetë zviceran dhe nuk do ta harrojë vendin e tij.
