Redon Makashi, këngëtari i njohur shqiptar, së fundmi mori pjesë në festivalin e fundvitit të RTSH-së ku u vlerësua nga juria me çmimin e dytë. I ftuar në emisionin “Ditë e Re” në “Ora News”, këngëtari ka sqaruar të vërtetat mbi atë që ndodhi në festivalin e RTSH-së.
Duke e konsideruar festivalin një koshere, ai u shpreh se është më shumë i zhgënjyer me veten dhe se e ka mbyllur kapitullin me konkurrencën, duke ua lënë atë artistëve të rinj.
“Jo i zhgënjyer, unë isha betuar që nuk do të do dal më në festival keq. U zhgënjeva me veten time. Isha në një luftë me veten time, të futem apo të mos futem. Dhe çmimin e prisja, ishin vetëm 2 pikë diferencë. Kam dëshirë që t’i lë rrugë të rinjve nëpër festival. E kam mbyll kapitullin me konkurrencën. Do të isha i kënaqur nëse do të isha i ftuar, të kisha një koncert timin, një album. Kapitullin me festivalin e kam mbyllur. Nuk kam çfarë të bëj më në festival sepse është një koshere. Pas sherri, zihesh me njerëzit dhe unë kam shumë miq e njerëz aty. Ndodhin keqkuptime dhe nuk dua të prish miqësi me shumë njerëz aty, për 2 elemente të caktuara që e bën këtë rrëmujë”.
Redoni tregoi pakënaqësinë e tij në festival, ku tha se ndarja e çmimeve fillon nga vendi i tretë ndërsa në Festivalin e RTSH-së filloi nga vendi i parë.
“Gjithmonë kur ka një event fillon nga vendi i tretë paraqitja e çmimeve. Kurse aty filloi nga vendi i parë dhe me vrap. Ishin 2 pikë diferencë”.
Makashi u përball dhe me një tjetër incident gjatë natës së parë të festivalit. Sapo ai nisi të këndojë muzika u ndalu papritur. Ai tha se kjo që ndodhi ishte vetëm një lapsus.
“Orkestra është për tu përgëzuar. Ndodhi një lapsus tek kënga ime dhe njerëzit menduan se ishte diçka e bërë kastile”.
