Policia italiane ka goditur bandën e shqiptarëve e cila furnizonte me drogë nëpër banesa klientë VIP. Lloji i drogës që ata shpërndanin ishte kokainë e cilësisë së parë.
Mediat italiane bëjnë me dije se në pranga kanë rënë 11 persona, por nuk kanë zbuluar identitetin e tyre.
Organizatori i grupit rezulton të jetë një person që ishte nën masën “detyrim paraqitje”, përpara autoritete italiane.
Ai kishte krijuar një rrjet i trafikantësh dhe shpërndarësish shqiptarë, të cilët përmes telefonit merrnin urdhra për dorëzimin e mallit nëpër banesat e klientëve. Policia bën me dije se për porositë dhe dërgesat përdoreshin kode të caktuara.
Secili nga shqiptarët kishin zonat e përcaktuara ku vepronte dhe “menaxhonin” jesët e ndara në provincat italiane.
Klientët ishin sipërmarrës, profesionistë të lirë të njohur, biznesmenë, të cilët kërkonin kokainë të cilësisë së parë, edhe ishin gati të paguanin shifrën që u kërkohej pa asnjë problem, deri në 60 euro për një dozë dhe shërbimin që merrnin direkt në shtëpi.
Policia sekuestroi 350 gramë kokainë, 500 gr marijuane, dhe materiale për prerjen dhe ndarjen e mallit nëpër doza, si dhe 500 doza të gatshme.
