Një vepër e mirë u ka përfunduar në një tragjedi për shqiptarin Dhimitri Andoni, me qëndrim në Clearwater, Florida.
Një i ri shqiptar nga Devolli, vetëm 22 vjeç, është përplasur për vdekje në një nga rrugët e Floridës në Shtetet e Bashkuara të Amerikës, teksa po kthehej nga shkolla ditën e enjte.
I riu shqiptar, në lëvizje e sipër në autostradë ndaloi për të ndihmuar një person tjetër, i cili ishte aksidentuar nga një motor, por më pas, Dhimitri Andoni, u përplas nga një kamion.
Mjeti po drejtohej nga një përdorues droge, ku sipas raportimeve, ai kishte paguar lirinë për 100.000 mijë dollarë.
Pas përplasjes, drejtuesi i kamionit i rrëmbeu makinën të riut, ndërsa kamionçinën e la në një cep të rrugës duke ia mbathur nga vendi i aksidentit. Sipas raportimeve, policia ka bërë të mundur arrestimin e drejtuesit të kamionçinës, Dana Byrd, i cili goditi për vdekje shqiptarin nga Devolli.
Dhimitri ishte një shembull për rininë shqiptare, ku krahas punës, ai ishte edhe një student i shkëlqyer në profilin e bankave, studimet e së cilës do i mbyllte në muajin qershor.
Shqiptari, tashmë i ndjerë, siç shprehet edhe vëllai i tij, ishte një ndihmës i jashtëzakonshëm për të gjithë shqiptarët që jetonin në zonën ku vepronte edhe ai, pasi i ndihmonte për të marrë patentën.
Trupi i pajetë i shqiptarit ndodhet në polici, ndërsa familjarët do të bëjnë tërheqjen e tij ditën e nesërme. Autoritetet amerikane kanë kërkuar të marrin në pyetje edhe personin e aksidentuar për të cilin 22-vjeçari shqiptar ndali makinën për t’i ardhur në ndihmë.
