Greqia po përballet me një situatat të rëndë natyrore për shkak të ciklonit “Zorbas”, që shkaktoi probleme në Korinth, Argolida, Mani. Deri tani, mediat greke nuk raportojnë për viktima, por vetëm për të zhdukur. Katër persona raportohen të zhdukur si pasojë e përmbytjeve.
Erërat e forta çuan në ndërprerje të energjisë për shkak të rrëzimit të pemëve në të gjithë vendin. Zjarrfikësit deri më tani kanë marrë më shumë se 1300 thirrje, për të ndihmuar në evakuimin e njerëzve të bllokuar në vetura dhe shtëpi.
Giannis Trafyllis, Sekretari i Mbrojtjes Civile tha: “Do të shpallet gjende e jashtëzakonshme për zonat e prekura”.
Rruga nacionale është plotësisht e mbyllur. Shërbimi i mbrojtjes civile paralajmëroi se Greqia veriore dhe qendrore gjithashtu mund të preken dhe u bëri thirrje qytetarëve të marrin masa vetë-mbrojtëse.
Në komunën Matoudi është shpallur gjendja e jashtëzakonshme për shkak të përmbytjeve të shumta. Uji ka bllokuar rrugët dhe ka hyrë në katet e para të shtëpive dhe dyqaneve. Shumë drejtues mjetesh kishin mbetur të bllokuar brenda automjeteve të tyre. Në ndihmë u shkuan ekipet e emergjencës. Kulmin e vet cikloni e arriti rreth orës 02:00 të natës sipas orës lokale, kur lumenjtë u frynë dhe vërshuan nëpër rrugët e qyteteve.
Për t’i shpëtuar zemërimit të natyrës, banorët u ngjitën në tarracat e pallateve dhe banesave të tyre. Madje edhe zjarrfikësit u përmbytën, pasi ujërat vërshuan në zyrën e Brigadës së Zjarrfikësve në komunën Mantoudi. Cikloni “Zorbas” tashmë është larguar, por pas ka lënë shkatërrim.
