Një 55-vjeçar është arrestuar në flagrancë, pasi tregtonte në Shëngjin jashtë kushteve të sigurisë ushqimore, duke rrezikuar shëndetin e konsumatorëve. Policia ka bërë të mundur sekuestrimin e 528 kg produkte mishi, të prodhuara jashtë kushteve të sigurisë ushqimore, si dhe në bashkëpunim me AKU Tiranë, u bllokua punishtja ku prodhohej.
Në sajë të operacionit të koduar ” Rotten meat”, është arrestuar në flagrancë shtetasi Arsim Çurdina, 55-vjeç, banues në Kosovë.
“Ky shtetas, në qytetin e Shëngjinit, me mjetin e tij, është kapur duke tregtuar në disa lokale një sasi prej 528 kg produkte mishi, të prodhuara në mënyrë të kundraligjshme, në një ambient në Tiranë, jashtë kushteve të sigurisë ushqimore, duke rrezikuar shëndetin e konsumatorëve, produkt të cilin, ia shiste restoranteve dhe ” Fast Food-ve” në Shëngjin, si dhe pa faturë tatimore, duke fshehur të ardhurat.
Vazhdojnë hetimet për dokumentimin e plotë të këtij aktiviteti kriminal, për të gjithë subjektet tregtare dhe personat e përfshirë”, bën me dije policia.
Veprat penale në ngarkim të tij “Fshehja e të ardhurave”, “Prodhim dhe shitja e ushqimeve e lëndëve të tjera të rrezikshme për shëndetin”, Manipulimi i tregut” dhe “Punësim i paligjshëm”. Materialet procedurale i kaluan Prokurorisë së Rrethit Gjyqësor Lezhë, për veprime të mëtejshme.
