Myrteza (Zani) Çaushi, ka qenë një nga kapobandat që veproi në qytetin e Vlorës gjatë vitit 1997. Banda e Çoles e drejtuar prej tij akuzohet për dhjetëra krime makabre, vrasje, grabitje, rrëmbime dhe përdhunime.
Duke vepruar në mungesë të strukturave shtetërore, Zani u pa nga një pjesë e vlonjatëve si një hero, që synonte të eliminonte armikun e tyre kryesor, Sali Berishën.
Ai u bë një VIP i mediave shqiptare dhe të huaja, ndërsa u angazhua si truprojë e kryeministrit italian Romano Prodi, gjatë vizitës që ky zhvilloi në qytetin bregdetar.
Zani nuk i fshehu në asnjë rast lidhjet me PS. Vëllai i tij i madh, ishte sekretari i përgjithshëm në PS-në e Vlorës. Ai u vra në shenjë hakmarrje nga bandat rivale, së bashku me dy vëllezërit e tjerë të Zanit Çaushit. Rivalitetin më të madh banda e Zani Çaushit e pati me Bandën e Gaxhait, e cila mbështeste PD.
Lufta mes tyre në më pak se 3 muaj, shkaktoi dhjetëra të vrarë e të plagosur. I forti i Vlorës u arrestua në vitin 1998, por u lirua më 22 mars 1999 në sallën e gjyqit, pasi u cilësua fajtor vetëm për armëmbajtje pa leje.
Por po në shtator të atij viti, pas një incidenti me armë në fshatin Mifol, Myrteza Çaushi përfundon në qeli, ku dënohet me burgim të përjetshëm.
