Presidenti i SHBA-ve, Donald Trump ka vizituar zonat e përmbytura të Teksasit, pas uraganit Harvey që la gjithçka të shkatërruar në Hjuston.
Duket se Trump ka “përveshur mëngët” teksa ka ndihmuar ngarkimin e ndihmave nga një kishë në një kamion, pasi është takuar me banorët dhe vullnetarët e zonave të përmbytura.
“Është mirë të ushtrohesh”, ka thënë Trump duke qeshur para medias teksa ngarkonte ndihmat në kamion.
Pamjet po bëjnë bujë në rrjet, ndërsa komentet kanë qenë të shumta. Shumë njerëz e kanë vlerësuar ndihmën e Trump, ndërsa ka të tjerë që e quajnë këtë veprim fals dhe thjesht për arsye politike.
Trump i kërkoi Kongresit rreth 8 miliardë dollarë për përpjekjet e shpëtimit dhe të rimëkëmbjes në Teksas dhe Luiziana.
Ai u takua me Guvernatorin e Teksasit dhe me Drejtorin e FEMA-s, kur arriti në Ellington Field, për t’u takuar me banorët dhe me vullnetarët, të cilët janë duke ndihmuar në përpjekjet e shpëtimit pas Uraganit Harvey në Hjuston.
Gjithashtu, presidenti Trump nënshkroi një urdhër ekzekutiv që e përcaktoi të dielën si një “Ditë Lutjeje” për viktimat e stuhisë Harvey.
Deri më tani, stuhia ka zhvendosur më shumë se 1 milion njerëz dhe ka marrë jetën e të paktën 39 të tjerëve.
