Politikania kolumbiane, Aida Merlano, është bërë kryelajm i mediave botërore për shkak të mënyrës së arratisjes së saj nga burgu.
43-vjeçarja është dënuar gjatë muajit të kaluar me 15 vite burg, për blerje të votave në zgjedhjet parlamentare të vitit të kaluar.
Politikania ka arritur t’i shpëtojë policëve, gjatë një vizite që asaj i ishte lejuar të bënte te stomatologu. Ajo ka përfituar nga ky rast, duke zbritur me litar nga dritarja e banesës ku ndodhej, ndërkohë që kalimtarët e rastit të cilët dëshmuan rastin nuk e kanë kuptuar se çfarë po ndodhte.
Madje siç duket edhe nga pamjet e videos, ata e kanë ndihmuar atë të ngrihet në këmbë.
Sipas mediave të huaja, gjithçka dukej të ishte e planifikuar pasi 43-vjeçaren po e priste një motoçikletë jashtë godinës.
Ndërkohë për kapjen e saj është dhënë një shpërblim prej 50 milionë pezos (rreth 13 mijë euro), për të gjithë ata që kanë informacion në lidhje me këtë ngjarje.
