Një re e madhe në formën e një “shpërthimi” ka trembur banorët e Ukrainës, të cilët shprehën shqetësimet e tyre në rrjetet sociale.
Reja gjigande u pa vetëm 60 milje larg Çernobilit, zonë ku ndodhi aksidenti famëkeq në vitin 1986. Përdoruesit e rrjeteve sociale kanë ngritur teori të ndryshme, lidhur me këtë fenomen.
Ka nga ata që thonë se kjo lidhet me testet e armëve bërthamore, ndërsa të tjerë shkruajnë se fenomeni ka të bëjë me qeniet jashtëtokësore.
“Mesa duket Putin po teston një armë të re bërthamore?”, shkruan Maxim Volokh.
“A është UFO?”, shkruan Mariya Pulyak, krahas videos së postuar në rrjetet sociale.
Megjithatë, shumica e njerëzve mendojnë se ky është një fenomen i motit, plotësisht natyror. Madje, i njëjti njoftim është bërë edhe nga Agjencia Shtetërore e Menaxhimit të Emergjencave të Ukrainës. Kjo e fundit i bëri thirrje qytetarëve se nuk ka asnjë arsye për t’u shqetësuar.
“The Mirror” raporton se ky është një lloj i veçantë i reve, i njohur me emrin shkencor “Cumulonimbus incus”, i cili parashikon ardhjen e një stuhie.
