I ka shpëtuar jo pak herë kokën liderit historik të Partisë Demokratike, Sali Berisha. Por prej 20 vitesh, ish-truproja Izet Haxhia është shndërruar në kundërshtarin e tij më të egër.
Me këmbënguljen e tij për t’u rikthyer në Shqipëri pas 19 vitesh arratie, për të rihapur dosjet e vjetra kriminale që pretendohet se implikojnë ish-kryeministrin, ai synon të sjellë për herë të parë në bankën e të akuzuarve, njeriun që e ka dominuar skenën politike të vendit 28 vitet e fundit.
Gjatë kësaj kohe, Berisha është akuzuar për shumëçka, por në asnjë rast nuk ka pasur guximin të përballet haptazi, dhe me dinjitet me organet e drejtësisë.
Deri më sot, kjo ka qenë tepër e thjeshtë. Me spastrimin e xhelatëve të diktaturës dhe futjen e “juristëve të plepave”, Berisha e shtiu herët në dorë sistemin gjyqësor, që do ta përdorte si një kamxhik për të ndëshkuar kundërshtarët e tij.
Sot që vetingu në gjyqësor po jep rezultatet e para, Haxhia pretendon se një drejtësi më pak e kompleksuar dhe e kapur nga politika, mund të faktojë fajësinë sipas tij direkte të Sali Berishës në vrasjen e Azem Hajdarit, grushtin e tentuar të shtetit dy ditë më vonë, hapjen e depove të armëve në vitin 1997, bashkëpunimin e fshehtë me Sllobodan Millosheviçin, torturimin dhe zhdukjen e Remzi Hoxhës, planin për të vrarë ish-kryeministrin Aleksandër Meksi, lidhjet me firmat pidamidale etj.
Në të gjitha reagimet e tij, Berisha është përpjekur ta skualifikojë Izet Haxhian si një bandit të rëndomtë që trillon marrëzira.
Megjithatë, akuzat artikulohen nga një njeri që ka qenë për vite me radhë shumë pranë Berishës, të cilat përmbajnë dëshmitarë dhe detaje shumë specifike.
Këto të fundit kanë nevojë të verifikohen nga prokuroria. Sigurisht aty ku është e mundur, pasi flitet kryesisht për ngjarje që kanë ndodhur 20 vite e ca më parë, dhe provat mund të jenë zhdukur apo tjetërsuar.
Topi është në fushën e një drejtësie që po rindërtohet nga e para. Javët dhe muajt që do të vijnë, do të provojnë nëse dëshmitari Haxhia, do të përdoret për të bërë vërtet drejtësi, apo për t’u përdorur nga mazhoranca si një shou mediatik për të tulatur Berishën dhe të tijtë, dhe shmangur vëmendjen nga skandalet qeveritare, me në krye dosjen “Tahiri”.
TIRANA TODAY
