Një operacion i Policisë nën emrin e koduar “Skuter” ka vënë në pranga një 36-vjeçar nga Tirana i cili posedonte 2 mina me telekomandë.
Efektivët e Seksionit kundër trafiqeve të paligjshme të Policisë së Lezhës, kanë mundur të identifikojnë dhe ndalojnë 36-vjeçarin i cili ishte duke udhëtuar me motor ndërsa me vete transportonte dy mina me telekomandë. Në videon e dërguar nga policia shihet se si policia ndalon shtetasin Fatjon Llanaj, afër Mbikalimit të Patokut, duke drejtuar një motor tip Piaggo, duke e shtrirë menjëherë përtokë.
Njoftimi i policisë:
Arrestohet në flagrancë poseduesi i tyre
Më datë 10.05.2018, në vijim të punës për parandalimin e ngjarjeve kriminale dhe goditjen e veprimtarive të kundraligjshme duke vendosur para përgjegjësisë ligjore autorët e dyshuar, nga efektivët e Seksionit kundër trafiqeve të paligjshme në Drejtorinë Vendore të Policisë Lezhë, bazuar në informacione të siguruara në rrugë policore, u bë i mundur arrestimi në flagrancë i shtetasit:
– Fatjon Llanaj, 36 vjeç, banues në Tiranë.
Ky shtetas u kap afër Mbikalimit të Patokut, duke drejtuar një motor tip Piaggo pa targë, ku në një çantë kishte të fshehur 2 mina me telekomandë të cilat u sekuestruan në cilësinë e provës materiale.
Vepra penale në ngarkim të tij “Mbajtja pa leje dhe prodhimi i armëve, armëve shpërthyese dhe municionit” parashikuar nga neni 278/5 i Kodit Penal.
Materialet procedurale iu referuan Prokurorisë së Rrethit Gjyqësor Kurbin, për veprime të mëtejshme.
