Sjellja e papranueshme e policisë maqedonase ndaj skuadrës shqiptare të Skënderbeut, e cila udhëtonte nga Zagrebi në Shkup, e më pas me autobus për në kufirin shqiptar është bërë problem.
Policia maqedonase ka përndjekur gjatë gjithë udhëtimit autobusin e skuadrës korçare. Në një moment, stafi dhe skuadra kanë vendosur të ndalojnë për ujë, apo për nevoja personale në një karburant. Makina e policisë është kthyer menjëherë duke tentuar të bllokojë derën, për të mos dalë askush nga autobusi.
Ambasada shqiptare në Shkup nuk ka asnjë informacion në lidhje me këtë situatë të pajustifikueshme. Të kontaktuar nga Top Channel, që ka siguruar edhe videon ekskluzive të shoqërimit, përfaqësues të ambasadës thonë se nuk janë sinjalizuar për asnjë situatë të veçantë që solli në këtë përcjellje të pakuptimtë të skuadrës shqiptare nga territori maqedonas.
