(CNN) Përmbytjet shkatërruese në verilindje të Australisë kanë detyruar mijëra njerëz të ikin nga shtëpitë e tyre dhe kanë sjellë gjarpërinjtë dhe krokodilët në rrugë, ndërkohë autoritetet paralajmërojnë erëra të forta dhe më shumë shi në ditët në vijim.
Sipas CNN që citon “7 News”, pjesa më e madhe e qytetit të Townsville në shtetin Queensland është e përmbytur, banorët kanë mbetur pa energji, ndërkohë që një pjesë janë detyruar të ngjiten në çatitë e shtëpive të tyre.
Shiu i fortë i së dielës detyroi autoritetet të hapnin digën e lumit Ross për të lehtësuar presionin dhe për të parandaluar shpërthimin, duke çliruar rreth 1.900 metër kub ujë në sekondë.
Përmbytjet masive që po godasin Townsville po vijnë në një kohë kur Australia është goditur nga një valë e nxehtë që ka përfshirë të gjitha territoret e vendit.
Më shumë se 100 milimetra shi të hënën dhe 75 milimetër të martën janë përllogaritur të bien të Townsville, sipas meteorologut të CNN, Karen Maginnis.
“7 News” raportoi se të gjitha rrethinat e Townsville ishin zhytur nën ujë. Banori lokal Gresham Ross tha për këtë televizion se ujërat e përmbytjeve janë më të lartat që ai ka parë në 30 vjet.
“Ju thjesht nuk mund të besoni se sa ujë ka ardhur nga lumi Ross,” tha ai.
Të shtunën, kur përmbytjet u shtuan me shpejtësi, policia doli të lajmëronte derë më derë banorët e Queenslandit, që të linin shtëpitë e tyre.
“Në thelb nuk është vetëm një ngjarje 20-vjeçare, por është një ngjarje që ndodh një herë në 100 vjet,” tha guvernatori i shtetit Anastacia Palaszczuk, sipas “7 News”.
Duke folur të hënën, Palaszczuk paralajmëroi: “Do të ketë reshje të mëdha edhe gjatë dy ditëve të ardhshme”.
“Do të ketë edhe dëmtime nga stuhitë dhe reshjet intensive që mund të shkaktojnë përmbytje të rëndësishme. Pra, edhe një herë, mesazhi ynë është, nëse nuk keni nevojë të dilni nëpër rrugë, ju lutem mos dilni”, shtoi ajo.
Qindra shtëpi në Townsville tashmë janë përmbytur, njoftoi “7 News”, dhe parashikohet që 10,000 deri në 20,000 prona të jenë në rrezik nga moti i keq.
Shërbimet e emergjencës kanë nisur të përdorin varka për të tërhequr banorët përmes ujërave të përmbytjeve në zonën e “Hermit Park” në Townsville.
Si për t’i bërë gjërat më keq për banorët, që të largohen nga shtëpitë e tyre, ka pasur shumë raste të shfaqjes, pranë qendrave të banuara, të krokodilëve dhe gjarpërinjve, të sjellë nga rritja e nivelit të përmbytjes.
Një banor i Mundingburra, Erin Hahn, i tha gazetarëve se të dielën në mbrëmje vuri re një krokodil të ujërave të ëmbla përpara shtëpisë së babait të saj .
“Ishte gati dy metër i gjatë (6.6 këmbë),” tha ajo. Përktheu dhe përshtati TIRANA TODAY
