Lideri i Aleancës Kosova e Re (AKR), Behgjet Pacolli, thekson se Kosova do të përballet me trazira të mëdha sa i përket çështjes së demarkacionit. Trazirat sipas Pacollit mund të përfshijnë edhe zgjedhjet.
Ai vuri në dukje se çështja e kufijve me Malin e Zi, mund të zgjidhet me një konsensus të gjerë, të të gjithë qytetarëve dhe institucioneve të Kosovës.
“Besoj se demarkacioni ka zgjidhje, por jo me këtë qasje dhe zgjidhja është atëherë kur ka një vullnet gjithë kosovar, gjegjësisht të gjitha institucioneve që ky problem të zgjidhet. Zgjidhja duhet të ndodhë me këtë situatë siç qeveriset sot siç bëhet politikë sot siç vepron edhe opozita e tanishme problemi i demarkacionit nuk zgjidhet. Demarkacioni do të shkaktojë problem do të shkaktojë trazira, do të shkaktojë edhe zgjedhjet”, ka thënë Pacolli për agjencinë EkonomiaOnline.
Kreu i AKR-së ka thënë se Qeveria gaboi kur e nënshkroi marrëveshjen me Malin e Zi për demarkacionin. Por, nuk i pëlqen as qasja e opozitës karshi kësaj problematike.
“Unë nuk kam qenë pjesë e asnjë komisioni, sa i përket Demarkacionit e kam shikuar vetëm nga periferia. Është bërë gabimi që është nënshkruar një dokument me Malin e Zi, ende pa u miratuar në parlamentin e dhe sot nga opozita është duke u shfrytëzua ky gabim në mënyrë drastike, po shfrytëzohet jo për zgjidhje në mënyrë konstruktive por në mënyrë destruktive, ky është realiteti.”, u shpreh Pacolli.
