Kryeministri Edi Rama është nervozuar keq sot gjatë fjalës së tij në panairin e parë të sporteve të aventurës.
Teksa fliste në podium, Rama është bezdisur nga të rinjtë e pranishëm, të cilët fishkëllenin pa pushim.
Edhe pse në minutat e para ai është përmbajtur, Rama nuk ka duruar më dhe ka sugjeruar personat që fishkëllenin që të shkonin në pyll dhe të hipnin në pemë.
“Së pari kam një sugjerim këtu për disa djem që fishkëllejnë nga kënaqësia. Këtu afër është pylli, mund të shkoni të hipni nëpër pemë dhe të fishkëlleni ndërkohë të tjerët, shumica dërrmuese që kanë ardhur këtu për të dëgjuar të dëgjojnë. Dakord bilbila, ja ku e keni pyllin, ju 10 bilbila që jeni këtu, dilni në pyll, hipni nëpër pemë e fishkëlleni”, tha Rama.
Kur djemtë e FRESSH nuk e kanë marrë parasysh sugjerimin dhe nuk e kanë kuptuar kryeministrin kanë vijuar të fishkëllejnë, Rama iu ka kërkuar t’i japin fund.
“Vazhdojnë e fishkëllejnë, kjo është e padrejtë, nuk jemi në pyll këtu, pylli është afër. Ti bilbil që të shoh atje, ti me gjyzlykë që ke gjithë kohës, është mirë t’i japësh fund këngës së fytit ose të shkosh në pyll”, tha Rama.
