Panik në qendër të Moskës. Një makinë taksi raportohet se ka marrë përpara turmën e njerëzish në rrugën Ilyinka, ndërsa të paktën 8 persona janë plagosur.
Dyshohet se të plagosurit janë tifozë meksikanë. Ndërkohë kryeqyteti rus është i mbushur me tifozë të shumtë që presin të ndjekin nga afër kampionatin Botëror.
Forcat e policisë ruse flasin për një aksident dhe jo për sulm terrorist. Shoferi i taksisë, një 28-vjeçar ka humbur kontrollin e mjetit dhe ka goditur fillimisht një semafor e më pas turmën e tifozëve. Autoritetet thonë se kanë mundur të arrestojnë shoferin me origjinë nga Kirgistani.
Ndërkohë, alarmi për sulme terroriste është rritur pas kërcënimit të hapur të ISIS, të cilët një ditë më parë thanë se ishin gati të përgjaknin stadiumet në Rusi. Sot, vetë Departamenti Amerikan i Shtetit këshilloi shtetasit amerikanë të kenë kujdes gjatë udhëtimeve të tyre drejt Moskës.
