Pas dështimit të 3 raundeve, ditën e djeshme dolën emrat “surprizë” të kandidatëve për president, të cilët ishin Ilir Meta dhe Petrit Vasili.
Pas shpalljes së kandidaturave, PS e bëri të qartë faktin se mbështeste plotësisht kreun e Kuvendit, Metën.
Megjithatë, duket se kandidatura e Vasilit ka qenë një formalitet, pasi sigurisht që Meta nuk i ka hyrë kësaj gare, pa pasur fitoren e sigurt të saj.
Megjithatë, duhet thënë se kjo lëvizje ishte “bombë”, pasi vetë kreu i LSI-së ka deklaruar më parë se nuk do e pranonte postin e Presidentit.
Deklaratën ai e bëri më 24 shkurt, në një intervistë për gazetarin Arian Çani, ku tha:
-Këtë gjë e mohoj (Postin e presidentit). Kam thënë që unë jam kryetar i LSI, kam marrë një mandat për të drejtuar këtë lëvizje dhe nuk mund t’i shmangem kësaj përgjegjësie. Por çështja e presidentit dhe e gjithë kjo klimë ku ne kemi hyrë aktualisht, krijon shumë probleme në një kohë të shkurtër, domethënë na duhet të jemi tepër të kujdesshëm dhe të përgjegjshëm. Mendoj se Shqipëria ka gra dhe burra që mund ta bëjnë shumë mirë këtë punë dhe çështja e presidentit nuk ka lidhje me mua.
-E refuzon?
-Po, patjetër. Në këtë moment është shumë e rëndësishme që edhe ky proces të zhvillohet në normalitet dhe mënyrë konstruktive. Emri nuk ka rëndësi për mua. Duhet të jetë një njeri që të gëzojë respektin e të gjithë palëve. Mua nuk ma ka propozuar njeri, por nuk e synoj këtë gjë dhe e kam përjashtuar, kjo është një gjë që është përjashtuar.
-Do i thuash jo?
-Po. Presidenti duhet të jetë sa më konsensual të jetë e mundur”.
Por, diçka ka bërë që Meta të ndryshojë tërësisht qëndrim dhe të votohet sot pasdite si president i Shqipërisë.
Video, minuta 39:45:
