Një tjetër krim në familje tronditi të dielën Shqipërinë. Violeta Donaj, ekzekutoi në mes të tregut me armë zjarri bashkëshortin Kujtim Donaj. Pak ditë më parë Çlirim Shaholli vrau në Durrës gruan e tij, nënë e 6 fëmijëve. Në çdo rast konfliktet kanë si shkak xhelozinë, tradhtinë, varfërinë…
Fundi i tyre tragjik, vjen më së pari si nga mentaliteti, ku divorci cilësohet ende si fundi i botës. Shumë martesa të palumtura, janë shndërruar në një “burg” për burrat dhe gratë. Ndihma ekonomike qesharake që i jep ky vend një nëne të papunë dhe kryefamiljare, e pamundëson aktin qytetar të ndarjes, kur bashkëjetesa bëhet e pamundur.
Policia i identifikon shpesh si “krime pasioni”,dhe shteti lan në një farë mënyre duart nga ngjarje të tilla. Derisa ndodh krimi i radhës, komentet pro dhe kundra nëpër rrjetet sociale, dhe pas disa ditësh çdo gjë harrohet.
Niveli e lartë i krimit në familje, është qartazi njëra nga simptomat e shoqërisë tonë të sëmurë. Dhe ajo nuk mund të shërohet me konferenca qeveritare , nisma nga OJQ apo debate televizive.
Ajo kërkon më së pari daljen e shumicës së shqiptarëve nga humnera ekonomike, pasi emancipimi nuk mund t’i paraprijë zhvillimit, por përkundrazi e ndjek këtë të fundit. Ritmi aktual, lë mjerisht pak shpresë se gjërat do të ndryshojnë së shpejti.
PËRSHTATI TIRANA TODAY
