Kur isha vetëm 11 vjeçe, pa e ditur dhe disi aksidentalisht u bëra një avokate e femrave. Isha duke parë një shfaqje televizive në shkollën fillore, dhe në një moment u shfaq një reklamë komerciale mbi larjen e enëve të kuzhinës, me një slogan që thoshte: “Gratë në mbarë Amerikën po luftojnë me enët dhe tiganët me yndyrë!”.
Dy djem nga klasa ime, thanë se grave u takon pikërisht kjo punë, të punojnë në kuzhinë. Më kujtohet se u ndjeva e tronditur dhe e zemëruar. Dhe gjithashtu ndihesha kaq shumë e lënduar se kjo nuk ishte e drejtë, dhe se ishte e nevojshme të bëja diçka. Kështu kur u ktheva në shtëpi, dhe i tregova babait se çfarë kishte ndodhur, ai më inkurajoi të shkruaja letra, dhe kështu bëra.U shkrova njerëzve më të fuqishëm, që unë mund të mendoja në atë moment.
Edhe pse isha 11 vjeçe, mendoja se nëse dikush duhet vërtet të më dëgjonte, atëherë përse të mos i shkruaja një letër Zonjës së Parë. Kështu i shkrova një letër zonjës së parë të asaj kohe, Hillary Clinton.
Gjithashtu, i nisa një letër edhe Linda Ellerbee, që në atë kohë drejtonte një program lajmesh për fëmijët, dhe më pas edhe avokates Gloria Allred. Pasi ndonëse isha vetëm 11 vjeçe, dëshiroja të hidha bazat e mia për të ardhmen.
Në fund i shkrova një letër kompanisë prodhuese të sapunit. Kaluan disa javë dhe unë mora papritur letra inkurajuese nga Hillary Clinton, Linda Ellerbee dhe Gloria Allred. Ishte e mahnitshme.
Në shfaqjen e re për fëmijët, ata dërguan një ekip televiziv në shtëpinë time për të bërë një kronikë mbi letrat e mia. Dhe afërsisht një muaj më vonë, prodhuesi i sapunëve “Procter & Gamble” e ndryshoi reklamën e detergjentit të larjes së enëve, si dhe ndryshoi edhe sloganin, nga “gratë në të gjithë Amerikën luftojnë me pjatat dhe tiganët me yndyrë”, tek “njerëzit në të gjithë Amerikën po luftojnë me yndyrën e enëve”.
Në atë moment, unë e kuptova rëndësinë e veprimeve të mia. Në moshën 11-vjeçare, kisha krijuar nivelin tim të vogël të ndikimit, duke ngritur zërin për barazinë gjinore. Grave u duhet një vend në tryezë. Ato kanë nevojë për një ftesë për t’u ulur aty, dhe në disa raste ju e dini se për çfarë kanë nevojë ato. Ato duhet të pastrojnë tryezën e tyre.
Thuhet se vajzat me ëndrra, mund të fuqizojnë njëra-tjetrën për të përmbushur një vizion i tillë. Sepse nuk mjafton thjesht të flasim për barazinë gjinore, por duhet të besojmë në të. Dhe nuk është e mjaftueshme thjesht të besojmë tek ajo. Duhet të punojmë. Le të punojmë pra së bashku, duke filluar që tani.
PËRSHTATI TIRANA TODAY
