Regjimi komunist, mburrej shpesh se ishte superior ndaj kapitalizmit të shthurur. Por “morali socialist” ishte hipokrit dhe fshihte shumë perversitete dhe sidomos krime seksuale.
Në vetëm një raport të 14 korrikut 1971, kryeprokurori i kohës Dhori Panariti, përmend rastin e përdhunimit të 3 nxënësve të mitura nga mësuesit e tyre. Pavarësisht denoncimit nga prindërit, prokuroria e linte çështjen në harresë, duke mos dashur të diskreditojë figurën e mësuesit.
Asokohe mësuesi quhej shpesh një “baba i dytë”. Ndërkohë, mijëra dokumente arkivore të periudhës së komunizmit, dëshmojnë se krimi ordiner ka qenë dominant gjatë gjithë viteve të regjimit. Teoria e një rendi dhe qetësie të garantuar nga pushteti i Enver Hoxhës, ka qenë thjesht një utopi.
Në një tjetër raport të Ministrit të Brendshëm, Feçor Shehu të qershorit 1971, thuhet se vetëm në 3 muajt e parë të vitit, 70 fëmijë kanë kryer 39 vjedhje. Në shumicën e rasteve bëhet fjalë për vjedhje batanijesh dhe sendesh të tjera të këtij lloji, çka vinte në dukje mjerimin e skajshëm të familjeve shqiptare./ TIRANA TODAY
