Vichai Srivaddhanaprabha, një biznesmen nga Tailanda që bleu Leicester City në vitin 2010 për 39 milionë stërlina, u pa thjesht si një i huaj nga anglezët, të cilët janë mësuar me milionerë të huaj që e kanë kthyer në trend të blejnë klube në Premier League.
Një i huaj që s’ka lidhje me sportin më popullor në botë por thjesht investon për të shtuar pasurinë e tij prej miliardësh, por të gjitha këto steriotipe të krijuara Vichai i hodhi poshtë me surprizën që i rezervoi botës së futbollit në vitin 2016-të, aty ku e shpalli kampion Leicester-in e tij, ai nuk zbriti në fushë të luajë por iu krijoi kushtet ideale dhe infrastrukturën e duhur të gjithë ekipit për t’u rritur dhe për t’u zhvilluar derisa prekën majën.
Beteja e tij e parë ishte kur në krye të “Dhelprave” vendosi Claudio Ranieri, një italian që në Angli e quajtën dështim akoma pa filluar, madje Gary Lineker shkroi në Twitter: “Claudio Ranieri, seriozisht?”. Presidenti tailandez bëri një lëvizje të fortë pasi Ranieri erdhi në vend të Nigel Pearson në verën e vitit 2015-të dhe ky ndryshim u pa më shumë si zhgënjimi i radhës i Leicester dhe tashmë mbijetesa në Premier League ishte vënë në dyshim.
Por, Ranieri dhe këmbëngulja e presidentit 60-vjeçar tregoi se me punë arrihet gjithçka. Në atë vit shpërthyen lojtarë si Jamier Vardy, Riyad Mahrez dhe N’Golo Kante, dy të fundit cilësohen si ndër lojtarët më të mirë në botë aktualisht dhe janë shitur në klube si Chelsea dhe Manchester City.
Ishte viti i tyre, ishte koha kur përralla u bë realitet, ishte viti ku Vichai ngriti në ajër trofeun e Premier League, aty ku konkurrenca e klubeve të mëdha është vrasëse por në atë vit lojtarët e tij u kthyen në luanë dhe Ranieri tregoi se është një strateg.
E shtuna e 27 tetorit të vitit 2018-të do të mbetet e shkruar si njolla e trishtë për historinë e këtij klubi dhe të gjithë futbollin në Angli e mbarë botën. Heshtja kaploi të gjithë pas një helikopteri të rrëzuar në parkingun e makinave të stadiumit “King Powers”. Ishte pikërisht mjeti i presidentit të Leicester që po largohej, ashtu siç bënte gjithmonë pas çdo ndeshje.
Tashmë Vichai nuk jeton më, konfirmimi do vijë dhe e gjithë bota do jetë në zi. Sot, futbolli në Premier League qëndroi në heshtje në nder të viktimave të këtij aksidenti, por vepra e Vichai Srivaddhanaprabha nuk vdes kurrë sepse është e shkruar në historinë e Leicester atë të Premier League dhe atë të historisë së përrallave që ndodhin përgjatë historinë së futbollit, si sporti më i dashur në mbarë botën.
