Palët nuk ndajnë të njëjtat qëndrime sa i takon Vettingut. Pas duelit të fortë Rama-Basha, e më pas vijimin e lojës nga deputetët e djathtë, është Ministrja e Drejtësisë, Etilda Gjonaj e cila kundërpërgjigjet haptazi se Vettingu po funksionon dhe se po pastrohet drejtësia. Sipas saj, Vettingu po rikthen shpresën te publiku se dhe në Shqipëri, mund të ketë drejtësi. Në këtë formë, po funksionon pastrimi i pallatit të drejtësisë.
“Vettingu po rikthen shpresën te publiku, se dhe në Shqipëri mund të ketë drejtësi. Po funksionon pastrimi i pallatit të drejtësisë. Reforma po jep rezultate pozitive, dhe për këtë s’ka kthim mbrapa”, tha ministrja.
Më tej, ministrja tha se boshllëku i krijuar është i përkohshëm dhe i kuptueshëm. Ajo shtoi se shantazhet për të kthyer pas procesin nuk mund të funksionojnë. “Ne do të jemi deri në fund garantët e një reforme që po bën historinë”, tha Gjonaj.
Ministrja fton edhe opozitën për bashkëpunim. “Shqipëria s’ka mbetur pa Gjykatë Kushtetuese, por ka shpëtuar nga një trupë e sëmurë. Operacioni në trupin e njeriut ku kishin gjetur strehë, kancer degradues. Ky boshllëk do të mbushet. Nuk çon askund bllokimi i ndryshimeve ligjore për shkollën e magjistraturës.
Ambasada Amerikane shprehu dje indinjatën. Ne i falenderojmë partnerët tanë për mbështetjen dhe garantojmë qytetarët se përpjekja e opozitës për bllokimin e shkollës së magjistraturës, ishte e pashpresë dhe s’ka kthim pas.
Asgjë dhe askush se bllokon dot më këtë rrugë. Asgjë nuk është jashtë parashikimeve tona, edhe vonesat. Askush s’është mbi ligjin, duke shantazhuar e kërcënuar. Vettingu s’diskutohet më, por zbatohet. E ftoj opozitën të bashkëpunojë”, tha Gjonaj.
Me pak fjalë, procesi nuk ka kthim mbrapa. Vettingu ka tronditur sistemin e kalbur të drejtësisë. Çdo ditë e më shumë po kthehen në fokusin e mediave, politikës e jo vetëm gjyqtarët dhe prokurorët, që do t’i shpëtojnë skanimit të Vetingut, për ligjshmërinë e pasurive, lidhjet me krimin dhe aftësisë profesionale.
