Kuvendi i Shqipërisë do të mblidhet pasditen e kësaj të marte në një seancë plenare për të votuar për ngritjen e komisionit ad hoc, që do të verifikojë kandidatët e institucioneve të rivlerësimit të gjyqtarëve dhe prokurorëve, pjesë e Reformës në Drejtësi.
Në rendin e ditës së seancës së Parlamentit, që do të zhvillohet në orën 18, parashikohet të votohet për projektvendimin “për procedurat parlamentare për funksionimin e komisioneve ad hoc” dhe realizimin e procesit të votimit, sipas ligjit për rivlerësimin kalimtar të gjyqtarëve dhe prokurorëve, gjithashtu për projektvendimin “për krijimin dhe përbërjen e komisionit ad hoc për verifikimin e kandidatëve për institucionet e rivlerësimit”.
Tri janë organet përbërëse të institucioneve të rivlerësimit: Komisioni, Kolegji i Apelimit dhe dy Komisionerët Publike me zëvendësat e tyre, që e çojnë në 27 numrin e përgjithshëm të anëtarëve të këtyre strukturave.
Mazhoranca ka propozuar 3 emrat e saj: Vasilika Hysi, Ulsi Manja dhe Luan Rama nga LSI. Megjithatë, duke ditur se opozita i ka bojkotuar punimet e Parlamentit prej javësh, ngritja e komisionit ad hoc, që ka një përbërje të barabartë anëtarësh, 3 nga mazhoranca e 3 nga opozita, duket se do të bllokohet, duke e bërë të pamundur vendimmarrjen e tij.
Ditën e shtunë, opozita paralajmëroi mospjesëmarrjen në seancën e sotme, duke i qëndruar kërkesës së saj për krijimin e qeverisë teknike, që do të mundësonte zgjedhje të lira dhe të ndershme.
