Vettingu, ose siç njihet ndryshe rivlerësimi kalimtar i gjyqtarëve dhe i prokurorëve, është procesi reformues i drejtësisë, që ka tërhequr më shumë vëmendjen e publikut dhe në mënyrë të veçantë të qytetarëve, të cilët në këto 27 vite demokraci janë përballur me zvarritje, praktika korruptive dhe të padrejta në proceset hetimore apo gjyqësore.
Sot është parashikuar të jetë një ditë e ngjeshur për Komisionin e Pavarur të Kualifikimit, pasi janë planifikuar që të zhvillohen pesë seanca, të cilat do të zgjasin deri në orën 16:00.
Në orën 09:30 do të jepet vendimi për gjyqtarin e Gjykatës së Lartë, Shkëlzen Selimi.
Më pas në orën 10:00, do të zhvillohet seanca dëgjimore për Medi Bicin, gjyqtar pranë Gjykatës së Lartë.
Në orën 12:00 do të zhvillohet seanca dëgjimore me Gentjan Medjan, gjyqtar pranë Gjykatës Administrative Shkalla e Parë Tiranë.
Në orën 14:30 është parashikuar seanca dëgjimore me Besnik Muçin, prokuror pranë Prokurorisë për Krimet e Rënda.
Dhe në fund, në orën 16:00 është seanca dëgjimore me Brunilda Kadin, gjyqtare pranë Gjykatës së Rrethit Gjyqësor Tiranë.
