“Pas formimit të Qeverisë së re të Kosovës duhet të fillojnë së pari dialogu i brendshëm në Beograd dhe Prishtinë dhe jo përmes Brukselit”, kështu është shprehur anëtari i Kryesisë së Lëvizjes “Vetëvendosje”, Belgzim Kamberi.
Ky i fundit tha se shpreson që qeveria e re e Kosovës do të ketë një qëndrim ndryshe dhe shumë më pozitiv ndaj shqiptarëve që jetojnë në Luginë, respektivisht në komunat e Preshevës, Bujanocit dhe Medvegjës.
“Ne jemi të angazhuar, që në muajin e parë, pas formimit të Qeverisë së Kosovës, nëse ajo është e VV, për të hapur dialogun e shpejtë me serbët që jetojnë në Kosovë, por në të njëjtën kohë të hapur dialogun në mes Qeverisë së Serbisë me shqiptarët që jetojnë në Serbi. Ne besojmë se dialogu i parë duhet të jetë i brendshëm dhe jo të jetë nxitur nga Brukseli”, ka thënë në vazhdim Belgzim Kamberi.
Sipas Kamberit, shqiptarët në Luginën e Preshevës nuk janë të kënaqur me qëndrimin e qeverisë së kaluar të Kosovës ndaj tyre.
