Presidenti i FSHF-së Armand Duka përgjatë një interviste për “News 24” ka theksuar se asgjë nuk e ndal inaugurimin e stadiumit.
Pjesë të shkëputura nga intervista:
“Po punohet me intensitet deri në datë 17. Tani jemi duke i dhënë dorën e fundit, duke montuar disa pajisje, duke pastruar dhe duke bërë gati të gjitha, për inaugurimin.
Stadiumin e kanë inspektuar disa specialistë të UEFA-s, duke qenë se kemi dhe ndeshje me Francën, kanë ardhur dhe përfaqësues të mediave franceze, gazetarë, komentatorë.
Specialistët kanë marrë shënim vërejtjet, të cilat nuk janë shumë esenciale dhe po i riparojnë.
Gazetarët dhe komentatorët do të vendosen në katin e parë në tribunë, pasi sipas tyre është dukur më e përshtatshme.
Nuk ka asnjë dyshim që stadiumi do të inaugurohet në datë 17, vetëm forcat madhore e ndalojnë”.
Ceremonia dhe ardhja e Makronit?
“Unë nuk jam në dijeni se Makroni sponsorizon kombëtaren, ndërsa Makronin e politikës e di më mirë Rama dhe jo ne”.
Emri i stadiumit? “Ne jemi në proces dhe për këtë. Janë disa oferta që shihen nga Komisioni i Prokurimit.
Uroj që ta arrijmë në një përfundim të kënaqshëm përpara datës 17.
Tribunat do të ketë emra personazhesh sportiv dhe historik të vendit”.
Me sa pikë jeni i kënaqur?
“I kënaqur jam me 6 pikë, disi i kënaqur me 4 pikë, ndërsa me 3 pikë më pak i kënaqur.
Duhet të provojmë gjithçka pasi nuk kemi asnjë gjë për të humbur. E dimë që Franca është kampione bote, por ne do të provojmë ta nisin me fitore stadiumin e ri”.
Reja dhe rinovimi? “Besoj se do të jetë në krye të skuadrës. Nuk ka dyshime nga ana jonë, por duhet firmosur kontrata dhe të zyrtarizohet”.
