Tashmë është e konfirmuar se i shumëkërkuari Klement Balili është vetëdorëzuar në Policinë e Shtetit. Balili u kthye edhe në një çështje politike për një kohë të gjatë, pasi akuzohet se ka lidhje të ngushta me LSI-në. Ish-ambasadori amerikan Donald Lu, kërkoi disa herë me ngulm arrestimin e tij.
Me dorëzimin e Balilit, konfirmohen dhe dështimet spektakolare të policisë, edhe pse janë organizuar 13 operacione për kapjen e tij.
Vetëdorëzimi i tij vjen vetëm pak ditë pasi një burim nga Ministria e Drejtësisë, njoftoi se Greqia i është përgjigjur në fund të dhjetorit të kaluar, përmes një letërporosie, kërkesës së Prokurorisë së Krimeve të Rënda, që këmbëngulte t’i dorëzoheshin prova shtesë të 46-vjeçarit.
Kjo letërporosi ishte justifikimi kryesor i Prokurorisë, që në vitin 2018 zgjati tri herë afatin hetimor për Balilin, i etiketuar ndryshe si “Eskobari i Ballkanit”, por që për shkak të dështimit të policisë për ta arrestuar, u quajt nga ish-ambasadori Donald Lu edhe si “magjistari”.
