Jo vetëm Lord Bajroni në shekullin e 19 i veshur me kostum popullor shqiptar, të qëndisur me fije ari!
Roland Tasho, fotografi i njohur, ka arritur që, në kohët moderne, të veshë me kostume popullore shqiptare rreth 140 personalitete të huaj, përfshirë presidentë, si ai kroat Stipe Mesiç, nënkryetarë parlamenti të Bashkimit Evropian, artistë të njohur, albanologë, historianë, ambasadorë etj. Prej 18 vitesh tashmë fotografit të njohur kjo iniciativë i është kthyer në qëllim në vetvete.
Gjatë një bisede me TIRANA TODAY, fotografi Tasho shpjegoi se ideja për të iniciuar një projekt me këtë temë i ka lindur në kohën kur ambasadori italian Mario Bova (ambasador i Italisë në Shqipëri në periudhën 1999-2003) përpara se të largohej nga Shqipëria, kërkoi të fotografonte dy vajzat e tij me kostume popullore shqiptare.
Këtu fotografi Tasho merr shtysë dhe si fillim arrin të veshë me kostume popullore shqiptare pothuaj të gjithë ambasadorët e vendeve të Bashkimit Evropian në Shqipëri, duke hapur edhe një ekspozitë, që merr vlerësime pozitive.
Më tej Tasho kapërcen Shqipërinë dhe nis një tur në disa kryeqytete të Evropës, Paris, Bruksel, Lisbonë, Romë, Budapest, Pragë, etj., për të fotografuar personalitete të huaj të veshur me kostume popullore shqiptare. Në çdo udhëtim i duhej të shkonte me kostume popullore me vete.
“Është mbase projekti më i bukur i karrierës sime. Kjo sepse të huajt e vlerësojnë etnografinë tonë. Kjo është habia ime më e madhe. Nëse u flet për politikë e politikanë nuk të marrin seriozisht, nëse u flet për traditë e për histori, janë të ndjeshëm e serioze”, thotë Tasho.
Por ka edhe opinione surprizë: “Njëri, pasi u vesh më kostum popullor me tha se ndihej si të ishte Skënderbeu. Një tjetër më tha se, pasi veshi këtë lloj kostumi, ishte ndjerë më i fortë, më i fuqishëm… Një tjetër, i cili doli xhiro rrugëve të Parisit, u habit kur pa se të gjithë e përshëndesnin etj,” rrëfen Tasho përshtypjet e personaliteteve të huaj për efektet e veshjes me kostume popullore shqiptare. TIRANA TODAY
