Përfaqësuesit politikë dhe institucionalë të serbëve nga veriu i Kosovës, kanë vendosur sot që të largohen nga të gjitha institucionet e Kosovës.
Kreu i Listës Serbe, Goran Rakiq, i cili njoftoi vendimin, tha gjithashtu do të japë dorëheqje edhe nga posti i ministrit që mban në Qeverinë e Kosovës.
Lista Serbe – partia më e madhe e serbëve në Kosovë – njoftoi sot se do largohej nga institucionet qendrore të Republikës së Kosovës, si dhe nga komunat në veri të vendit.
“Ne kemi vendosur të largohemi nga të gjitha institucionet politike, Kuvendi, Qeveria, dhe nga katër komunat në veri të Kosovës, por edhe që të largohen serbët nga gjyqësori, policia si dhe stafi administrativ në katër komunat në veri”, ka thënë kryetari i Listës Serbe, Goran Rakiq pas takimit.
Pas vendimit të marrë në një takim me dyer të mbyllura në Zveçan, dorëheqje kanë dhënë edhe pjesëtarët serbë të Policisë së Kosovës, ata të gjyqësorit dhe prokurorisë në veri.
Rakiq është shprehur se vendimet për largim nga institucionet do të zbatohen deri në momentin kur “Prishtina fillon të respektojë të drejtën publike ndërkombëtare, dhe marrëveshjet e arritura në Bruksel”.
“Kjo do të thotë, konkretisht, derisa të tërheqin vendimet e njëanshme dhe të kundërligjshme për riregjistrim, derisa të formojnë Asociacionin e komunave serbe, në përputhje me marrëveshjen e parë dhe të gjitha marrëveshjet e tjera të lidhura me këtë çështje në dialog”.
Ky vendim u pasua me shtimin e flamujve serbë në veri të vendit, ku kishte edhe postera që shkruhej “Kjo është Serbia”. Flamuj të shumtë janë vendosur në rrugë, në dyqane dhe ndërtesa të tjera.
