Kreu i Iniciativës Qytetare “Serbia, demokracia, drejtësia” dhe njëherësh kandidat për kryetar të Mitrovicës Veriore, Oliver Ivanoviç ka komentuar pritshmëritë e tij për zgjedhjet lokale të 22 tetorit.
Në një intervistë për gazetën serbe “Danas”, politikani serb, Oliver Ivanoviç ka deklaruar se në ditën e zgjedhjeve priten incidente në veriun e Kosovës. Sipas tij, parandalimi i vjedhjes së votës është gati i pamundur ndërsa saktëson se dita e zgjedhjeve lokale do të shoqërohet me tensione.
“Presionet kanë filluar që nga dita kur u shpallën zgjedhjet, lista e kandidatëve u mbajt sekret. Pati fushatë për frikësim, thirrje telefonike e çka jo. Nëse mund ta parandalojmë vjedhjen, besoj se fitorja do të jetë e jona. Incidentet janë të mundshme në ditën e zgjedhjeve. Pasi në zgjedhjet e fundit, ata mbushën kutitë”, deklaroi Ivanoviç. Ivanoviç duke folur për formimin e Asociacionit, ka thënë se formimi bashkësisë së komunave me shumicë serbe mund të mos ndodhë asnjëherë.
“Nuk besoj se shqiptarët e Kosovës do ta formojnë Asociacionin përveç nëse është diçka krejtësisht e parëndësishme”, tha ai. Ivanoviç shtoi se deklaratat e Haradinajt se shqiptarët nga jugu i Serbisë duhet të marrin shtetësinë e Kosovës, janë shumë serioze. Sipas tij, këto deklarata janë fushatë për zgjedhjet e jashtëzakonshme parlamentare.
