Presidenti i Venezuelës Nicolas Maduro ka vendosur të mos tërhiqet edhe pse në vend vazhdojnë protestat e dhunshme kundër qeverisë së tij. Deri tani të paktën 60 persona kanë gjetur vdekjen.
Presidenti i Venezuelës Maduro ka kërcënuar me tërheqje nga Organizata e Shteteve Amerikane në shenjë proteste ndaj asaj që ai e quan, një fushatë e udhëhequr nga Shtetet e Bashkuara për të minuar sovranitetin e Venezuelës.
Ai ka bërë thirrje për rishikimin e kushtetutës së vendit, duke e konsideruar si të nevojshme për të vendosur paqen dhe për të ndalur siç pretendon, mundësinë e një grushti shteti prej kundërshtarëve të tij.
Protestat e përditshme që kërkojnë zgjedhje të reja, lirimin e të burgosurve politikë dhe ndihma humanitare, janë kthyer në përplasje të dhunshme.
