Senegali e ka nisur me një fitore historike Botërorin, pasi ka mposhtur 2-1 në ndeshjen e parë Poloninë në Moskë. Një ndeshje mjaft emocionuese që u vendos nga gabime trashanike nga ana e polakëve në të dy golat e pësuar.
Polonia e nis ndeshjen mjaft mirë duke sulmuar dhe duke e detyruar Senegalin të rrijë në gjysmëfushën e tij, por ata me lojtarë si Mane apo Niang ishin mjaft të rrezikshëm në kundërsulme. Koulibaly kishte një mision që të zhdukte nga fusha Lewandowskin dhe ja doli mjaft mirë. Pak përpara se të përfundonte pjesa e parë ishte autogoli i Cionek ai që zhbllokoi rezultatin për Senegalin që e meritonte golin për volumin e lartë të lojës të krijuar.
Pas pushimit Polonia luajti më përpara por pa arritur sukses dhe pas një gafe trashanike të një prej lojtarëve, ishte ish-lojtari i Milan Niang ai që dyfishoi rezultatin.
Polakët nuk e humbin shpresën dhe në fund të takimit arrijnë të shënojnë golin që i rifut në lojë me anë të Krychowiak dhe del e tëra përpara për golin e barazimit. Por Senegali shpëton mirë falë portierit dhe shpirtit të garës duke marrë tre pikë të rëndësishme.
