Kampionët në fuqi kanë shtyrë festën e kampionëve të rinj dhe jo me barazim, por me një fitore mjaft të bukur. Është Kukësi që ka triumfuar në Korçë përballë Skënderbeut, falë një eurogoli të shënuar nga bomberi i verilindorëve, Sidrid Guri. Ndeshja u zgjidh në minutën e 78’, falë kryegolashënuesit të kategorisë Superiore, duke mposhtur Shehin dhe duke lënë të shtangur të gjithë tifozët korçarë që kishin mbushur stadiumin pasi ishin përgatitur për festën e titullit.
Ndeshja nis mjaft mirë për vendasit dhe në tribunë ishte një spektakël i vërtetë, por në minutën e 12-të, Kukësi pretendoi për 11-metërsh pas një kontakti të Gurit me Alitin brenda zone. Kryesori Hamiti e cilësoi si të rregullt aksionin por pamjet e përsëritura tregonin qartë që mbrojtësi i Skënderbeut nuk kishte prekur topin.
Më pas bëhet protagonist Frashëri që realizon një superpritje ndaj Vangjelit, rastin më të mirë për shënim e kishte Sowe në minutën e 40’, por sulmuesi ngatërrohet në zonë dhe nuk bën një goditje të mirë.
Pjesa e dytë nisi si e para, me një Skënderbe dominues, por finalizimi për djemtë e Ilir Dajës nuk ishte i saktë në asnjë aksion. Atë e bëri mjaft mirë Guri, i cili me anë të një goditje dënimi në kufi të zonës dhe e mposht Shehin me një goditje spektakolare.
Vetëm 2 minuta më pas fati nuk ishte me verilindorët pasi goditja e Ethemit nga jashtë zone, u ndal nga shtylla. Deri në fund shifrat nuk ndryshuan më në stadiumin Skënderbeu të Korçës, me Kukësin që mori një fitore të rëndësishme duke blinduar vendin e dytë dhe duke i shtyrë festën korçarëve me të paktën 1 javë edhe pse tashmë diferenca mes tyre në renditje është 11 pikë.
