Ministrja e Drejtësisë Etilda Gjonaj, në një deklaratë për mediat, e ka cilësuar si të padrejtë vendimin për Dritan Dajtit nga Gjykata e Krimeve të Rënda. Ajo deklaroi se ky është një vendim i padrejtë, dhe se nuk pajtohet me gjykimin e shkurtuar.
Gjonaj i mëshoi fort faktit se vendimi në fjalë ndaj Dajtit është në kundërshtim të standarteve profesionale. Duke qëndruar në të njëjtën linjë, Ministrja e Drejtësisë tha se Reforma në Drejtësi do të ndalojë çdo lloj padrejtësie.
Ajo njoftoi se do i drejtohet Këshillit të Lartë Gjyqësor, për procedimin e trupës së gjyqtarëve që dhanë vendimin.
“Vendimi i gjykatës për uljen e dënimit ndaj Dritan Dajtit është skandaloz dhe i papranueshëm. Vendimi është në kundërshtim me çdo standard të procesit penal dhe përbën precedent të rrezikshëm. Qeveria dhe kjo shumicë as nuk e ka dhe nuk synon vendosjen e kontrollit mbi drejtësinë.
Por në raste të tilla papërgjegjshmërie, nuk mund të ri pa reaguar me të gjitha format ligjore. Ministria do t’i drejtohet KLGJ-së për të marrë masa displinore ndaj gjyqtarëve. I kërkoj KPK dhe ONM që në vlerësimin e gjyqtarëve dhe prokurorëve të fokusohen në elementë të tillë. Mbështes prokurorinë në ankimimin në Gjykatën e Lartë”, tha ministrja Gjonaj.
Prokuroria e Apelit për Krimet e Rënda pritet t’i bëjë rekurs dënimit me 25 vite burgim të Dritan Dajtit nga Gjykata e Apelit. Organi i akuzës është në pritje të zbardhjes së vendimit, i cili rrëzoi atë të Gjykatës së Shkallës së Parë për Krimet e Rënda, e cila e kishte dënuar me burgim të përjetshëm Dajtin në 2014, i akuzuar për vrasjen e 4 efektikëve të policisë.
