Cristiano Ronaldo tashmë është 33 vjeç dhe ka nisur një aventurë të re në futbollin italian me Juventusin. Padyshim që Italia nuk është ambienti më i mirë për sulmuesit, pasi taktikat mbrojtëse janë të panumërta dhe është e vështirë të shënosh. Këtë e tregojnë edhe shifrat e CR7 në dy ndeshjet e para, pasi akoma nuk ka festuar asnjë gol.
Por ylli portugez duket se ka marrë një vendim mjaft të rëndësishëm, duke kërkuar që të mos grumbullohet nga kombëtarja e Portugalisë për një kohë, pasi dëshiron tu tregojë kritikëve se dhe tek Juventusi do të jetë po aq i suksesshëm sa tek Manchester United dhe Real Madrid.
Sipas “Gazzetta dello Sport”, golashënuesi më i mirë i Portugalisë nuk do të grumbullohet me kombëtaren për ndeshjen miqësore kundër Kroacisë që do të luhet më 6 shtator, e ndërsa do të humbasë gjithashtu edhe përballjen me Italinë të 10 shtatorit për Ligën e Kombeve.
Ronaldo dëshiron që gjatë kësaj periudhe të qëndrojë në Torino dhe të mësojë sa më shumë për futbollin italian, si dhe të njihet më mirë me shokët e skuadrës, për të funksionuar sa më mirë në fushën e lojës.
Ambicjet e Ronaldos janë të mëdha, ai ka fituar 5 herë “Topin e Artë”, por në një intervistë është shprehur se dëshiron që ai numër të jetë i njëjtë me atë që mban në shpinë, pra shtatë. Ndihma më e madhe që pritet të japë portugezi te Juventusi është triumfi në Europë. Duke parë se me Real Madrid, Ronaldo fitoi tre herë rresht Champions Leaguen ai mund të jetë çelësi që edhe Juventusi të arrijë suksesin e shumëpritur këtë sezon.
