Një grua japoneze e certifikuar si personi më i vjetër në botë, ka vdekur në moshën 119-vjeçare, thanë zyrtarët lokalë të hënën.
Kane Tanaka lindi më 2 janar 1903, në rajonin jugperëndimor Fukuoka të Japonisë, në të njëjtin vit që vëllezërit Wright fluturuan për herë të parë dhe Marie Curie u bë gruaja e parë që fitoi një çmim Nobel.
Zonja Tanaka ishte në gjendje relativisht të mirë shëndetësore deri vonë, dhe jetonte në një shtëpi të moshuarish, ku i pëlqente lojërat në tavolinë, zgjidhja e problemeve matematikore, pijet e gazuara dhe çokollata.
Kur ishte e re, zonja Tanaka drejtonte biznese të ndryshme. Një shekull më parë, ajo u martua me Hideo Tanaka në vitin 1922, duke lindur katër fëmijë dhe duke adoptuar të pestin.
Ajo kishte planifikuar të përdorte një karrige me rrota për të marrë pjesë në stafetën e pishtarit për Lojërat Olimpike të Tokios në vitin 2021, por pandemia e pengoi atë ta bënte këtë.
Në ditëlindjen e saj të 119-të më 2 janar, anëtarët e familjes së zonjës Tanaka thanë se ajo shpresonte të jetonte deri në 120 vjeç.
Kur Rekordet Botërore Guinness e njohën Tanaka si personin më të vjetër në botë në vitin 2019, ajo u pyet se në cilin moment ishte më e lumtur në jetë. Gruaja, e cila në atë kohë mezi fliste, u përgjigj me një fjalë të vetme: ‘Tani’.
Rutina e përditshme e zonjës Tanaka përfshinte zgjimin në orën 6:00 të mëngjesit dhe pasditeve të kaluara duke studiuar matematikë dhe duke praktikuar kaligrafi.
“Një nga argëtimet e preferuara të Kane është një lojë e Othello-s dhe ajo është bërë eksperte në lojën klasike të tavolinës, shpesh duke mposhtur stafin e shtëpive të pushimit”, tha Guinness.
Lufta Ruso-Japoneze filloi vetëm një vit pasi lindi zonja Tanaka, dhe në fëmijërinë e saj jetoi vitin e fundit të epokës Meiji të Japonisë, e konsideruar si një periudhë transformuese e modernizimit.
Ajo u njoh si personi më i vjetër në botë, nga Rekordet Botërore Guinness kur ajo ishte 116 vjeç në 2019.
Sipas faqes së internetit të Guinness World Records, zonja Tanaka u martua me kushëririn e saj në moshën 19-vjeçare në vitin 1922.
Burri dhe djali i saj i madh luftuan në Luftën e Dytë Sino-Japoneze e cila filloi në 1937.
Në moshën 90-vjeçare, zonja Tanaka kishte një operacion të kataraktit. Rekordmenia gjithashtu iu nënshtrua një operacioni të kancerit kolorektal kur ishte 103 vjeç.
Japonia ka popullsinë më të moshuar në botë, sipas të dhënave të Bankës Botërore, me rreth 28 përqind të moshës 65 vjeç e lart.
Por ka njerëz të tjerë që mund të kenë qenë edhe më të vjetër se zonja Tanaka.
Në fund të vitit të kaluar, personi më i vjetër i Kinës, i cili pretendonte se ishte personi më i vjetër, vdiq në moshën 135-vjeçare.
Alimihan Seyiti, nga Komuxerik në qarkun Shule në Rajonin Autonom të Xinjiang Uygur në veriperëndim, lindi më 25 qershor 1886, gjatë dinastisë perandorake Qing – por kjo nuk është konfirmuar ndërkombëtarisht.
Verën e kaluar, një grua në Turqi pohoi gjithashtu se kishte festuar ditëlindjen e saj të 119-të, gjë që do ta bënte atë më të vjetër se zonja Tanaka.
Mediat turke raportuan se Seker Arslan kishte festuar momentin historik mahnitës e rrethuar nga familja e saj në qytetin verior të Amasya. Sipas dokumenteve, ajo ka lindur më 27 qershor 1902.
Personi më i vjetër i verifikuar nga Guinness ishte francezja Jeanne Louise Calment, e cila vdiq në moshën 122 vjeç (e 164 ditë) në 1997.
Burimi i lajmit: dailymail. Përshtatur nga Tirana Today
