Një ngjarje e rëndë ka ndodhur në Elbasan, ku një çift nga Kosova kishin shkuar në llixha. Gruaja me iniciale E.I, 60 vjeçe, është gjetur e pajetë nga bashkëshorti i saj, ndërsa nuk dihen shkaqet e vdekjes.
Ndërkohë, i shoqi ka pësuar gjendje shoku pas skenës së rëndë. Burri ka bërë një shëtitje jashtë, ndërsa kur është kthyer, gruaja e tij nuk është përgjigjur. Ai ka shkelmuar derën e më pas ka gjetur të pajetë bashkëshorten.
Çifti i të moshuarve nga Kosova kishin ardhur para disa ditësh për kurim 10 ditor në Banjat Termale të Llixhave të Treganit në Elbasan. Pas ngjarjes, shtetasi kosovar u dërgua me urgjencë në Qendrën Spitalore Tiranë, ndërsa trupi i të ndjerës në Morgun e Qendrës Spitalore Elbasan.
Ndërkaq kanë filluar hetimet për zbardhjen e rrethanave të vdekjes së kosovares së moshuar.
“Më datë 31.10.2018, rreth orës 03:30 në Spitalin e Elbasanit është dërguar e vdekur shtetasja E. I., 60 vjeçe, banuese në Plloshan Kosovë si dhe në gjendje të rëndë shëndetësore bashkëshorti i saj shtetasi J. I., 70 vjeç, banues në Plloshan Kosovë, të cilët kishin ardhur për të bërë banja termale në Llixha Tregan Elbasan dhe ishin akomoduar në hotelin e shtetasit N.K.47 vjeç. Nga këqyrja e kryer nga mjeku ligjor nuk janë konstatuar shenja dhune. Grupi hetimor po heton për zbardhjen e plotë të rrethanave të ngjarjes”, thuhet në njoftimin e policisë.
