Laureati kinez i Çmimit Nobel për Paqe, Liu Xiaobo, ka ndërruar jetë gjatë betejës së tij me kancerin. Zyrtarët kinezë refuzuan thirrjet e ndërkombëtarëve për të liruar nobelistin dhe për t’i dhënë mundësi që të kalojë ditët e fundit të jetës i lirë. Liu Xiaobo, 61 vjeçar ndërroi jetë një muaj pasi ishte transferuar nga burgu në spital për të trajtuar kancerin e mëlçisë, që gjendej në fazën e fundit.
Autoritetet e qytetit Sheniang thanë se Liu Xiaobo vdiq pasi kaloi nën kujdesin intensiv në një spital lokal.
Liu Xiaobo u arrestua në vitin 2008 pasi ka shkruar peticionin, i cili bënte thirrje për mbrojtje të drejtave të njeriut dhe reformimin e sistemit politik në Kinë. Në vitin 2009, ai është dënuar me burgim 11-vjeçar.
Organizatat botërore për të drejtat e njeriut apeluan ndaj autoriteteve të lirojnë Liu Xiaobo dhe t’i lejojnë trajtimin jashtë vendit. Gjermania dhe SHBA shprehën gatishmërinë për trajtimin e Liu Xiaobo si “shenjë humaniteti”. Liu Xiaobo ka fituar Çmimin Nobel për Paqe në vitin 2010.
